Gen 19 | NdeIBE | STEP | Izingilosi zombili zafika eSodoma kusihlwa, uLothi ehlezi esangweni ledolobho. Wathi ezibona wasukuma wazihlangabeza wathi mbo phansi ngobuso.

Genesis 19

Ukubhujiswa kweSodoma leGomora

1 Izingilosi zombili zafika eSodoma kusihlwa, uLothi ehlezi esangweni ledolobho. Wathi ezibona wasukuma wazihlangabeza wathi mbo phansi ngobuso. 2 Wathi, “Makhosi ami, ake liphambukele endlini yenceku yenu. Lingageza izinyawo zenu lilale khona anduba liqhubeke ngendlela yenu ekuseni.” Zaphendula zathi, “Hatshi, sizalala esigcawini phandle.”

3 Kodwa waphikelela kakhulukazi zaze zahamba laye zangena endlini yakhe. Wazilungisela ukudla, wazenzela isinkwa esingelamvubelo, zadla. 4 Zingakayilala, amadoda aqhamuka kuzo zonke izindawo zedolobho laseSodoma – amajaha lamaxhegu – bayihanqa indlu. 5 Amemeza uLothi athi, “Angaphi amadoda afike kwakho lamuhla kusihlwa? Akhuphe eze lapha ngoba sifuna ukulala lawo.”

6 ULothi waphuma wayakhuluma lawo wavala umnyango ngemuva kwakhe, 7 wathi, “Hatshi, bangane bami. Lingayenzi into le embi kangaka. 8 Khangelani, ngilamadodakazi amabili angakaze alale lendoda. Wothini ngiwalethe lapha kini lenze elikuthandayo ngawo. Kodwa lingenzi lutho kula amadoda ngoba angaphansi komthunzi wophahla lwami.”

9 Aphendula athi, “Suka endleleni yethu.” Bathi njalo, “Umuntu lo weza lapha njengesizwe, kodwa khathesi usefuna ukuba ngumahluleli! Wena-ke sizakuthwalisa nzima kulawo.” Babelokhu beminyezela uLothi, bafuqela phambili bezama ukwephula isivalo.

10 Kodwa amadoda lawo ayephakathi avula adonsela uLothi endlini avala isivalo. 11 Yikho asewatshaya ngobuphofu amadoda ayesemnyango wendlu leyo, amajaha lamaxhegu, basebesehluleka ukubona umnyango.

12 Amadoda lawo amabili athi kuLothi, “Bakhona yini abanye olabo lapha abakhwenyana, amadodana kumbe amadodakazi, loba nje omunye edolobheni leli ongowakho? Bakhuphe lapha, 13 ngokuba sizayibhubhisa indawo le. Insolo efika kuJehova ngalababantu inkulu kabi okokuthi useze wasithuma ukuthi silibhubhise.”

14 Ngakho uLothi waphuma wayakhuluma labakhwenyana bakhe labo abasebethembise ukulobola amadodakazi akhe. Wathi, “Phangisani, phumani kulindawo, ngokuba uJehova usezalibhubhisa idolobho leli!” Kodwa abakhwenyana bakhe bacabanga ukuthi uyahlayaza.

15 Kwathi emathathakusa izingilosi zakhuthaza uLothi zathi, “Phangisani! Thatha umkakho lamadodakazi akho womabili akhona lapha, ngoba lizaqabuka likhukhulwa nxa idolobho selijeziswa.”

16 Wathi esatomatoma, amadoda amxhakalaza ngesandla kanye lesandla somkakhe lezamadodakazi akhe womabili abaholela ngaphandle kwedolobho bephephile, ngoba uJehova wayelomusa kubo. 17 Bonela ukuthi bakhutshwe, omunye wazo wathi, “Balekani liqinise! Lingakhangeli emuva, njalo lingemi ndawo emagcekeni! Balekelani ezintabeni funa likhukhulwe!”

18 Kodwa uLothi wathi kuzo, “Hatshi, makhosi ami, bakithi! 19 Inceku yenu isizuze umusa emehlweni enu, njalo selitshengise umusa omkhulu kimi ngokuphephisa impilo yami. Kodwa ngingeke ngibalekele ezintabeni; ububi lobu buzangifica ngihle ngife.

20 Khangelani, nanku umuzi oseduze engingabalekela kuwo, njalo mncinyane, wothani ngibalekele kuwo – mncinyane, kawunjalo? Lapho ngizasinda.”

21 Yathi kuye, “Kulungile, ngiyasamukela njalo lalesi isicelo; kangizukuwubhidliza umuzi okhuluma ngawo. 22 Kodwa balekela khona masinyane, ngokuba kangiyikwenza lutho uze ufike khona.” (Yikho umuzi lowo wabizwa ngokuthi yiZowari.)

23 Ngesikhathi uLothi efika eZowari ilanga laseliphumile elizweni. 24 Yikho uJehova wasenisa umlilo wesolufa etshisayo phezu kweSodoma leGomora – uvela kuJehova usehla emazulwini. 25 Kanjalo wawabhidliza lawomadolobho lamagceke wonke, labo bonke ababehlala kuwo amadolobho kanye lezimila elizweni. 26 Kodwa umkaLothi wakhangela emuva, waba yisiduli setshwayi.

27 Ekuseni kakhulu ngosuku olulandelayo u-Abhrahama wasuka wabuyela endaweni lapho ayeme phambi kukaJehova khona.

28 Wakhangela malungana leSodoma leGomora, malungana lalo lonke ilizwe lamagceke, wabona izikhatha zentuthu ziqonga zisuka phansi, njengomlilo usuka esithandweni.

29 Yikho kwathi uJehova ebhubhisa amadolobho asemagcekeni wakhumbula u-Abhrahama, wamkhupha uLothi enkemenkemeni eyatshabalalisa amadolobho lapho uLothi ayekade ehlala khona.

ULothi Lamadodakazi Akhe

30 ULothi lamadodakazi akhe womabili basuka eZowari bayahlala ezintabeni, ngokuba wayesesaba ukuhlala eZowari. Yena lamadodakazi akhe womabili babehlala ebhalwini. 31 Ngolunye usuku indodakazi endala yathi kwencinyane, “Ubaba useluphele, njalo kakulandoda lapha engalala lathi, njengoba kungumkhuba emhlabeni wonke. 32 Kasidakise ubaba ngewayini besesilala laye ukuze silombe usendo lwakwethu ngobaba.”

33 Ngalobobusuku uyise bamnathisa iwayini, indodakazi endala yangena yembatha laye. Yena wayengaboni izolala lokuba isivuka.

34 Ngosuku olulandelayo indodakazi endala yathi kwencinyane, “Izolo ebusuku ngembathe lobaba. Kasimdakise futhi ngewayini ngalobu ubusuku lawe uhambe uyokwembatha laye ukuze silombe usendo lwakithi ngobaba.”

35 Yikho bamdakisa uyise ngewayini ngalobobusuku njalo, indodakazi encinyane yahamba yayakwembatha laye. Njalo kazange ananzelele ukuthi walala nini lokuthi wavuka nini.

36 Ngakho womabili amadodakazi kaLothi athatha izisu kuyise. 37 Indodakazi endala yazala indodana yamutha ibizo yathi nguMowabi: nguye uyise wamaMowabi alamhla nje.

38 Indodakazi encinyane layo yazala indodana, yayitha yathi nguBheni-Ami; nguye uyise wama-Amoni alamhla nje.